Menn uppskera eins og þeir sá

Sagt er að menn uppskeri eins og þeir sá. Einnig að þegar menn þvinga fram vilja sínum, þá fari hlutirnir að vinna gegn þeim. Þetta eru Sjálfstæðismenn að upplifa þessa dagana. Sjálfstæðisflokkurinn hefur fram til þessa verið hagsmunaflokkur sem bæði leynt og ljóst hefur varið hagsmuni sinna manna - og það með kjafti og klóm ef á þarf að halda.

Það var afleikur hjá Geir H. Haarde fyrrverandi formanni flokksins að gangast við að hafa tekið við 55 milljóna greiðslunni frá FL-Group og Landsbankanum. Hver trúir því að hann einn hafi komið að þessu máli? Þetta er ekki í fyrsta sinn sem forystumenn flokksins ljúga að almenningi. Það gerði núverandi formaður Bjarni Benediktsson þegar hann sem formaður allsherjarnefndar samþykkti ríkisborgararétt fyrir tengdadóttur Jónínu Bjartmarz fyrrverandi alþingismann og ráðherra Framsóknarflokksins. Tengdadóttirin hafði aðeins beðið í nokkra mánuði í röðinni á meðan gengið var framhjá fólki sem hafði beðið í áraraðir. Slík veiting var áður óþekkt. Bjarni sagði að þessi veiting hefði verið fullkomlega eðlileg!

Málþóf Sjálfstæðismanna vegna stjórnarskipunarlaganna á Alþingi þessa dagana er heldur ekki til þess fallið að bæta stöðu flokksins. Þar berjast þeir með kjafti og klóm við hagsmunagæslu og að verja völd. Þetta hefur mælst illa fyrir hjá þorra þjóðarinnar. Frumvarpinu er m.a. ætlað að færa meir völd til almenning og að tryggja að í stjórnarskrá standi svart á hvítu að auðlindir landsins verði eign íslensku þjóðarinnar. Þessu geta Sjálfstæðismenn ekki unað. Með málþófinu eru Sjálfstæðismenn búnir að mála sig út í horn. Það væri niðurlægjandi að gefast upp - og að halda áfram fram að kosningum yrði ekki betra.